جرائم

لاہور: (نمائندہ خصوصی) پولیس کے مطابق ون ویلنگ اور پتنگ بازی کے خلاف کریک ڈاؤن ڈی آئی جی آپریشنز ڈاکٹر حیدر اشرف کی ہدایت پر کیا گیا۔ شہر بھر میں ہونے والے خصوصی کریک ڈاؤن کے دوران پولیس نے مختلف علاقوں سے ون ویلنگ اور پتنگ بازی میں ملوث 13 نوجوانوں کو گرفتار کر کے ان کے قبضہ سے 100 سے زائد پتنگیں اور بھاری مقدار میں ڈور برآمد کر لی۔ ملزموں کے خلاف متعلقہ تھانوں میں 13 مقدمات بھی درج کر لئے گئے۔

لاہور،رائے ونڈ( نمائندہ خصوصی ) رائیونڈ کے علاقے میں دو روز قبل اغوا ہونے والی ڈیڑھ سالہ بچی کی لاش نالے سے برآمد ، لواحقین کا ملزمان کی گرفتاری نہ ہونے پر لاش سڑک پر رکھ کر احتجاجی مظاہرہ، پولیس اور حکومت کے خلاف نعرے بازی کی ۔ بتایا گیا ہے کہ ڈیڑھ سالہ ایمان فاطمہ گزشتہ دنوں گھر کے باہر سے پراسرار طور پر لاپتہ ہو گئی تھی ۔ کوٹ رادھا کشن روڈ پر نالے سے اسکی تشدد زدہ لاش دیکھ کر راہگیروں نے پولیس کو اطلاع دی ۔اطلاع ملنے پر پولیس اور ورثا دونوں موقع پر پہنچ گئے پولیس نے لاش کو نالے سے نکال کر مردہ خانے منتقل کردیا ۔ ایمان کی ہلاکت سے اہلخانہ پر قیامت ٹوٹ پڑی کم سن مقتولہ کی ہلاکت پر ماں کو غشی کے دورے پڑنے لگے ۔ ورثا نے رائیونڈ روڈ پر ٹائر نذر آتش کئے اور پولیس کے خلاف احتجاج شروع کر دیا۔مظاہرین نے ایمان فاطمہ کو اغوا کے بعد قتل کرنے والے ملزموں کے گرفتار نہ ہونے پر پولیس کے خلاف شدید نعرے بازی کی۔ان کا کہنا تھا کہ پولیس بروقت کارروائی کرتی تو ملزموں کو گرفتار کیا جا سکتا تھابعد ازاں پولیس افسروں کی جانب سے انصاف کی یقین دہانی پر مظاہرین نے احتجاج ختم کر دیا۔